أعظم عالم في التاريخ .. نيكولا تسلا Nikola Tesla

أعظم مخترعي القرن العشرين

أعظم عالم في التاريخ ..نيكولا تسلا Nikola Tesla
أعظم مخترعي القرن العشرين، هذا إذا معتبرناهش أعظم مخترعي التاريخ…مخترع و فيزيائي و عالم ميكانيك و أب الكهرباء المغناطيسية، باش نبسْطوا أكثر هو الي اخترع الشيء الي اصبح كيف الماء و الهواء في اهميته بالنسبة للانسان العصري ، هو الي اخترع التيار الكهربائي المناوب Courant alternatif إلي نخدموا بيه في الاجهزة الاكترونية   تاعنا و نضويو بيه  ديارنا ( التريسيتي)  .. بصح هذا ماشي كلشي!!!
“نبداوها من الاول : تسلا  من للصغر كان عبقري  في القسم مثلا ما كانش يستعمل أوراق، كل شي يتخدم و يتفرز و يتسجل في مخو و دايمن يطردوه حاسبينو يغش ..
كي وصل الثلاثين ترك صربيا مسقط رأسو و طلع لأمريكا، هناك بدات مسيرتو الصحيحة ، أبحاثو و تجاربو و إختراعاتو هوما الي صنعوا التيليفزيون و الراديو (حكمتلو المحكمة العليا بامريكا عام 43 الي هو صاحب الإختراع) ، أما أكبر و أشهر إختراعاتو هو التيار الكهربائي إلي قام  بثورة حقيقية في العالم و جابتلو الشهرة و الاموال و الأضواء، Tesla_Sarony
كل هذا النجاح جابلو بغض ”توماس أديسون” الي كل مرة كان يكهرب حيوان حتى يتشوط باش يبين للعالم خطورة التيار الكهربائي…

تيسلا هو أب الثورة التكتولوجية اللي رانا عايشين فيها .. مصباح الفلوريسنت، مصابيح النيون، المبادئ الأولية للرادارات، الميكروسكوب الإلكتروني، المايكروويف، الراديو، التلفزيون، اللاسلكي والتيليكوموند .. منها لي لحقونا و سمعنا بيهم و منها لي خباوه كيما اختراع النقل اللاسلكي للكهرباء ووشيعه تسلا التي تولد كهرباء لا نهائيه تستمد طاقتها من الفراغ وسلاح هاارب السري الذي يستخدم للتحكم في الطقس وتحريض الزلازل ..

السؤال الي يطرح نفسو كيفاش رجل هارب و مخ كيما السي نيكولا مجهول تمامًا لدى الجميع ؟؟؟ هدا يسموه التجاهل المقصود.
دايما حاول الاقتصاديون بأن يبينوا  تيسلا شخصية مجنونة تثير السخرية لأنه اختراعاته كانت عكس واش حابين و خاصة اختراع النقل اللاسلكي للكهرباء ووشيعه تسلا و نجحوا هاذ الشي فعلا بينوا شخصيتو غريبة الأطوار و حتى الخرطي الي خرجوه عليه قلة نومه (يرقد ساعتين في النهار) خلات الناس تتصوروا كانو ساحر أو مشعوذ و قعدت صورتو هكداك في المخيلة الشعبية ، و ظهر هذا في فيلم The Prestige…
و حتى كي توفى كان  وحدو فقير و معدم في ال84 سنة، أوراقو و أبحاثو و مشاريعوا كامل اخذتهم الحكومة الأمريكية، و خدمت عليهم و كانوا أساس برنامجها لغزو الفضاء و خلق مصادر الطاقة و غيرها من العلوم التي كان ”تسلا” يسبق فيها عصرو ، و حتى اختراعاتو الي تفوت ال700 إختراع سرقوها بزاف و نسبوها لرواحهم .
من أشهر ما قال ”نيكولا تسلا” :

لو كان الكراهية نلقاولها طريقة باش تولي تيار كهربائي…أكيد نلقاو الطاقة الي تضويلنا العالم كامل ..

غير معروف
About بلقاسم شماخ 23 Articles
أنصاف الاشياء... لا تجعلك تتقدم و لا تعفيك من حرج التراجع